Microsoft products in jail

Window$ Vista

هيلامانات كبيرة في نيويورك

يا سيدي ولت البارح خرج الويندوس فيستا في اﻷسواق وكالعادة امّاليه عملولو هيلمان كبير أمّا شنوّة الّي باش يزيد ها الفيستا ؟ بكل صراحة وقت الّي نسمع المبرمجين واﻷخصائيّين (…) في مايكروسوف عدّاو خمسة سنين باش في الآخر “حلّ الصّرّة تلقى خيط” على شكون يتبهنسو ؟

حسب الأخبار الّي قريتها البارح في الصحافة الكندية ما ثمّة حتّى شي يستحق أنّو واحد عندو إكس بي وإلاّ 2000 يبدّل ويشري النّظام الجديد. ها النّظام هذا الّي ربّي يعلم بيه قدّاش يعدّي من فيروس في الثانية وإلاّ قدّاش من مئات الثغرات عندو في السلامة متاعو. على كل، إذا تحب تكون مواطن حضاري ونحنا نعرفو التونسي يتمتّع بهذا الكلّ (…) حضّر كاستك : اﻷسوام متاع ويندوس فيستا - للّي مزّالو ما حبّوش يقلبو الفيستا على بيل غايتس - تتراوح بين ّ199 و 499 دولار (من غير ضرايب) وبما أنّ اﻷسواق ها الأيامات عبارة على احتكارات منظمّة، خرجت شركة دال باش تنصح النّاس الّي يحبّو يستعملو الفيستا باش يشريو أورديناتورات ثنائي النّوات وعندو زوز ميقابايت من الذاكرة الحية والمعروفة بالرّام. يحييكم يا جماعة دال.ـ

مايكروسوفت ضربت أخماسها في اسداسها وقالت أنّها تتوقّع مبيعات في الثلاث أشهر هاذم مرتين قد الويندوس إكس بي وخمسة مرّات قد الويندوس 95. مع العلم أنّو تقريبا 800 مليون حاسوب في العالم فيهم نظام تشغيل ويندوس. كما تتوقّع شركة مايكروسوفت أنّ على اﻷقلّ 200 مليون بشر باش يستعملو فيستا أو ماهو مع فيستا قبل نهاية العام.ـ

نكمّلو باش نقولو أنّو معا الفيستا خرج اﻷوفيس 2007. وديما حسب اﻷخصائيين في مجال اﻹعلامية في الصحافة المحلية “طاس في جنبو نقبة”. ـ

نختم ونقول أنّو فمّا عباد بدات تفركس على الكراك. هاني كنت نعمل في طلّة في منتدى الترجي وفمّة شكون ديجا دبّرو ويفركس كيفاش يخدّمو. يا تونسي يقوى عليك ربّي …ـ

ننصحكم إذا كانكم ماكمش ضد مايكروسوفت وإلاّ ما تحسّوش بالدّوخة كلّ ما تسمعو ها الاسم باش تمشيو تعملو طلّة في الموقع هذا. تلقاو فيه تحليل مطوّل على الفيستا.ـ

Blue Screen of Death

Le pauvre citoyen tunisien n’aura toujours pas un accès rapide à ce type de service. Thanks Micro$oft.